Брисел, 6 октомври 2011 (МИА) - Министрите за одбрана на НАТО изразија загриженост во однос на последните инциденти на Косово, кои можат да го забават планот за намалување на мировната мисија на Косово, изјави министерот за одбрана на Хрватска Давор Божиновиќ.
- Хрватска пројави голем интерес за ситуацијата на Косово, бидејќи учествува во мисијата со два хеликоптери и 20 војници, изјави Божиновиќ.
- На состанокот на министрите за одбрана на земјите членки на НАТО беше изразена загриженост од последните настани во Косово, кои најверојатно ќе влијаат на плановите за намалување на мисијата на КФОР, рече Божиновиќ по првиот ден од состанокот во Брисел.
Меѓу другото, на состанокот е разговарано и околу идното реформирање на Алијансата и операциите на НАТО во Либија, Авганистан и Косово.
- Јасно е дека решение за ситуацијата на Косово може да се најде единствено преку политички договор меѓу Белград и Приштина со посредство на ЕУ. Ние се надеваме дека сите заинтересирани страни, особено директните учесници во регионот, ќе покажат значителна политичка волја за надминување на сегашната ситуација, изјави хрватскиот министер за одбрана.