Анкара, 25 октомври 2011 (МИА) - Спасувачките екипи и натаму се во потрага по жртви и преживеани и ги пребаруваат урнатините на зградите од разурнувачкиот земјотрес во кој на југоистокот на Турција загинаа најмалку 279 лица, додека околу 1.300 се повредени.
Спасувачите се концентирани на местата Ван и Ерчис, иако се стравува дека стотици лица останале затрупани во трошните куќарки од плитари во оддалечените села, кои исто така беа погодени од земјотресот со јачина од 7,2 степени според Рихтеровата скала, најсилниот во Турција во последната деценија.
Агенциите јавуваат дека очајни преживеани граѓани, заробени под куповите бетон и метал, молат за помош, а некои од нив со мобилни телефони им се јавуваат на семејствата и пријателите дека се живи.
Во земјотресот повеќе илјади луѓе останаа без домови и се присилени веќе втора вечер да ја минат под отворено небо, и покрај ладното време.
Организацијата на Црвената полумесечина обезбеди 500 шатори само за градот Ерчис, каде градскиот стадион е претворен во огромна полска болница.
Во спасувањето учествуваат 2.400 екипи од 45 градови, а во регионот се испратени 200 амбулантски возила , соопштија властите.