Виена, 25 октомври 2011 (МИА) - Косовскиот премиер Хашим Тачи денеска го обвини Белград за „негативното влијание“ врз Србите во Северно Косово, додавајќи оти не постои никаков конфликт меѓу Владата на Косово и граѓаните во северниот дел.
Тачи наведе дека протестите и барикадите на граничните премини се „последица од измамата и лажните ветувања на Србија“.
Тој истакна дека барикадите од северниот дел на Косово многу брзо ќе бидат отстранети и „по 12 години хаос и анархија наскоро ќе се воспостави владеење на правото“.
Тачи повтори дека Приштина нема да преговара за граничните премини и дека „не постои никаков конфликт меѓу Владата на Косово и граѓаните на северот“.
Косовскиот премиер коментирајќи го дијалогот Приштина - Белград наведе дека разликата „меѓу Приштина и Белград е во тоа што косовските власти се многу разумни и креативни, а Белград сака да седи и дискутира, а никогаш не ги применува работите“.