Атина, 10 ноември 2011 (МИА) - Грчкиот премиер Јоргос Папандреу и опозицискиот лидер Андонис Самарас синоќа ја разгледуваа можноста поранешниот вицепретседател на Европската централна банка (ЕЦБ) Лукас Пападемос да ја предводи новата коалициска влада, која земјата треба да ја спаси од банкрот, пренесоа агенциите, повикувајќи се на владин претставник, кој побарал анонимност.
Папандреу на Самарас му кажал дека ги прифаќа условите кои ги поставил Пападемос за да стане премиер, и го повикал и опозицискиот лидер да се слушне со поранешниот висок раководител на ЕЦБ.
Пападемос побарал двете главни политички партии да потпишат дека го прифаќаат спасувачкиот план на еврозоната, како и да добие поеластичен рок за владата, која евентуално ќе ја предводи, односно таа да има повеќе време од стоте дена до 16 февруари, за кога се предвидени предвремените избори.
Пападемос уште сака во новата влада да учествува и опозициската Нова демократија, која засега одбива да влезе во неа.
Денеска се очекува нова средба меѓу Папандреу и Самарас.
Грците и кредиторите на земјата веќе три дена со се поголем ужас набљудуваат како грчките партиски лидери спорат за се помалиот список со кандидати кои ќе застанат на чело на владата на националното единство, забележуваат агенциите.
Поранешниот министер за финансии Стефанос Манос ги прекори Папандреу и Самарас дека со нивното држење и штетат на иднината на Грција во еврозоната, ризикуваат земјата евентуално да се врати кон својата национална валута.