Анкара, 15 ноември 2011 (МИА) - Премиерот на Турција Реџеп Таип Ердоган изјави дека неговата земја веќе нема доверба во режимот на претседателот Башар ал Асад со кој до неодамна Турција имаше пријателски односи и многу развиена соработка.
Претседателот на турската влада го предупреди Ал Асад дека заради бруталната пресметка со опозициските групи ќе се најде на листата на лидери кои се „хранат со крв“.
Ердоган го повика сирискиот претседател да ги казни оние кои се одговорни за неодамнешните напади врз турските дипломатски претставништва во неговата земја.
-Остро го осудувам нападот врз турското знаме и нашите дипломатски мисии, истакна тој.
Приврзаниците на сирискиот претседател минатата недела се обидоа да упаднат во турската амбасада во Дамаск и два други конзулати. Тие извикуваа антитурски пароли затоа што Анкара ја поддржа одлуката на Арапската лига оваа земја да се исфрли од организацијата. По инцидентот Турција ги повлече членовите на семејствата на своите дипломати од Сирија.