Анкара, 18 ноември 2011 (МИА) - Шефот на турската дипломатија Ахмет Давутоглу денеска предупреди дека судирот во Сирија би можел да прерасне во граѓанска војна, што би имало последици и во регионот.
- Новите напади на армиските дезертери врз силите на режимот претставува опасност судирите да се претворат во граѓанска војна. Ова е моментот кога треба да се спречи масакрот и во тоа е значајна арапската иницијатива, истакна Давутоглу.
Тој истакна дека Турција ќе го помогне Националниот сириски совет, кој досега не е признаен од ниту една земја. Советот претходно побара од Турција да отвори свое претставништво во Истанбул.
Арапската лига му даде рок од три дена, кој утре истекува, на сирискиот претседател Башар ал Асад да ги прекине „крвавите репресии“ врз неговите противници, а во спротивно би биле воведени санкции за Сирија.