Приштина, 23 февруари 2012 (МИА) - Косовскиот премиер Хашим Тачи изјави дека Србија со новиот договор во Брисел, ќе ја признае независноста на Косово, јавија белградски медиуми.
- Со новиот договор, што ќе биде постигнат денеска во Брисел, Србија ќе ја признае независноста на Косово, изјави Тачи за Експрес. Приштинското издание публикуваше на својот веб-сајт само извадоци од интервјуто.
По посетата во Приштина на американскиот заменик државен секретар Вилијам Барнс, Тачи изјави дека е постигнат договор Косово да биде претставено на регионални форуми со споменување на Декларацијата за независност од 17 февруари 2008 година, одлуката на Меѓународниот суд по прогласувањето независност и Резолуцијата 1244 на СБ на ОН од 1999 година.
Сите опозициски партии во Косово беа против споменување на Резолуцијата 1244 при претставување на Косово на меѓународни форуми. Прашањето за регионалното претставување на Косово е меѓу главните теми на новиот круг преговори меѓу Белград и Приштина што се одржуваат од вчера во Брисел.