Атина, 14 мај 2012 (МИА) - Грчкиот претседател Каролос Папуљас предлага влада од технократи, која ќе биде поддржана од Парламентот, изјави вечерва по разговорите со шефот на државата лидерот на ПАСОК, Евангелос Венизелос.
Папуљас ова го предложил вечерва на средбата со лидерите на трите партии, Нова демократија, ПАСОК и Демократска левица, Андонис Самарас, Венизелос и Фотис Кувелис.
Преговорите за составување на коалициска влада ќе продолжат утре во 14 часот по локално време со учество на сите парламентарни партии, со исклучок на неонацистичката Златна Зора, рече Венизелос по средбата која траеше околу еден час.
Тој сепак не е оптимист дека ќе биде составена влада од технократи. - Работите се многу тешки. Не сум оптимист, рече лидерот на ПАСОК.
Самарас и Венизелос се подготвени да ја разгледаат можноста за составување на кабинет од технократи.
На утрешните преговори ќе учествуваат и лидерите на двете леви партии, кои се против спасувачкиот план за Грција, СИРИЗА и Демократска левица.