Атина, 23 мај 2012 (МИА) - Постоењето на планови за излез од еврозоната „не можат да се негираат“, изјави во интервју за „Волстрит џурнал“ поранешниот грчки премиер Лукас Пападимос, предупредувајќи дека таквиот потег би влијаел дури и на земјите надвор од еврозоната.
- Иако не е веројатно дека таквото сценарио ќе се оствари, и иако тоа не е пожелно ниту за Грција ниту за други земји, не може да се порекне дека се вршат подготовки за да евентуалните последици на излез на Грција од еврозоната би биле ограничени, истакна поранешниот потпретседател на Европската централна банка.
Излезот на Грција би имал „катастрофални“ економски последици, порача поранешниот премиер на таа земја, во првото интервју по минатонеделното заминување од власт.
Пападимос ги наведе проценките дека вкупната цена на излезот на Грција од еврозоната би можела да изнесува од 500 милијарди до билион евра, вклучувајќи го влијанието на пазарот, прекуграничните ефекти на ширење на кризата и штета по реалната економија.