Белград, 9 април 2013 (МИА) - Со истрели од огнено оружје маж рано изутринава уби 13 луѓе во местото Велика Иванча, кое се наоѓа меѓу градовите Младеновац и Топола во Србија, соопшти директорот на српската полиција, Милорад Вељовиќ.
Според него, 12 лица се убиени на самото место на инцидентот, а едно им подлегнало на здобиените повреди во Ургентниот центар во Белград.
- Две лица се борат за живот. Меѓу нив најверојатно е и сторителот на ова ужасно злосторство, рече Вељовиќ.
Дежурниот лекар во службата за Брза помош во Младеновац, Васиљ Жмико за Танјуг изјави дека две лекарски екипи заминале на местото на инцидентот од каде во Белград, пренеле тројца ранети.
Жмико информира дека во Службата за брза помош повикот за испраќање медицински тимови во Велика Иванча бил добиен околу 5:40 часот.
Танјуг претходно јави дека 13 лица се убиени во Велика Иванча кога 60-годишниот Љубиша Б. од огнено оружје пукал врз луѓето во негово соседството, убивајќи шест мажи, шест жени и едно новороденче.
Напаѓачот потоа стрелал и во неговата сопруга во обид да ја убие и на крајот се застрелал и себеси. Според болнички извори, убиецот и неговата сопруга се здобиле со прострелни рани и се наоѓаат во критична здравствена состојба.
Полициската истрага на местото на инцидентот е во тек.