Вашингтон, 4 октомври 2013 (МИА) - Српскиот премиер Ивица Дачиќ изрази уверување дека Србија ќе биде прва наредна членка на ЕУ, како и очекувањето оти тоа ќе се случи што побрзо.
- Сакаме Србија да стане членка на ЕУ што е можно побрзо. Уверени сме дека Србија ќе биде следна, 29-та членка на ЕУ, бидејќи веруваме оти тоа е потребно и на Србија и на ЕУ, рече Дачиќ во интервју за Си-Ен-Ен.
Тој изрази очекување дека Србија ќе биде примена во следните десет години.
На прашањето како го гледа решението за проблемот со Косово, Дачиќ призна дека не е лесно да се најде решение за Косово, особено, како што рече, во оваа фаза кога работите „отишле предалеку“.
- Многу подобро и поправично решение можеше да се најде порано, со што ќе ја избегневме војната и напнатоста во регионот. Тоа, меѓутоа, не е дел од нашиот актуелен дијалог, рече Дачиќ.
- Би сакале односите да бидат нормализирани и да постигнеме конечно решение, рече тој и додаде дека Србија не може и не сака да ги внесе своите проблеми во ЕУ.
- Тоа е една од причините поради кои водиме отворен дијалог со Приштина за да ги нормализираме односите и да ги решиме проблемите пред приемот во ЕУ. Но тоа не значи промена на политиката кога се работи за признавање на независноста на Косово, истакна Дачиќ.