Тузла, 7 февруари 2014 (МИА) – Полициски сили синоќа со употреба на солзавец растераа демонстранти пред зградата на Владата на Тузланскиот кантон со што ги прекинаа протестите во Тузла.
- Во Универзитетскиот клинички центар во Тузла примени се 33 полицајци и пет цивили кои се повредени во немирите, изјави за БХРТ портпаролката на Центарот, Ерсија Ашчериќ Мујединовиќ. Во Итната помош лекарски третман добиле 100 повредени полицајци и 28 граѓани.
За денеска се најавени нови протести во голем број градови во Босна и Херцеговина.
Во тој кантон денеска нема да се одржува настава во основните и средни училишта, и одложени се испитите на Универзитетот во Тузла.
Протестите почнаа во средата со учество на незадоволни работници од пропаднати приватизирани компании, невработени млади лица и членови на боречки организации. Во немирите уапсени се 27 луѓе од кои 24 се пуштени подоцна на слобода. На работниците од пропаднати фирми и незадоволни граѓани кои им се придружија, поддршка им дадоа и демонстранти во Сараево, Бихаќ, Зеница, Какањ, Приедор и други градови.