Анкара, 16 април 2014 (МИА) - Лидерот на главната опозициска политичка сила во Турција, Народно републиканската партија, Кемал Калачдароглу изјави дека новите надлежности на турската разузнавачка служба МИТ ќе ја претворат во структура, слична на Гестапо во нацистичка Германија, пишува весникот „Заман“.
Во обраќање пред парламентарната група на неговата партија тој истакна дека Турција се повеќе ги губи карактеристиките на правна држава и напредува кон еден поинаков режим.
- Државата не се управува со разузнавање, туку со морал, знаење и заслуги. Доколку ја претворите земјата во држава на разузнавањето, ќе ја претворите во поробена држава, предупреди Калачдароглу.
Опозицискиот лидер повика да не се заборави искуството со тајната полиција Гестапо во Германија за време на Втората светска војна, која беше во служба на Нацистичката партија.
- Формираа разузнавачка организација, ја озаконија, но таа не разузнаваше за државата, туку за партијата. Низ истото сега поминува Турција. Сакаат да создадат нов модел на Гестапо, предупреди тој.