Анкара, 17 април 2014 (МИА) - Поголемиот број на пратеници од владејачката турска Партија на правдата и развојот (АКП) денеска со тајно гласање ја поддржаа идејата премиерот Реџеп Тајип Ердоган да се кандидира за претседател на првите директни претседателски избори во август.
Гласањето претставуваше неофицијален тест на внатрепартиската поддршка, но Ердоган сам ќе одлучи дали ќе се кандидира за претседател.
- Убедливо мнозинство во АКП ја поддржа идејата Ердоган да се кандидира за претседател. Мала група оценува дека тој треба да остане на чело на партијата, изјави неименуван партиски извор.
До сега шефот на турската држава го избираше Парламентот. Актуелниот претседател Абдула Ѓул е близок соработник на Ердоган и еден од основачите на АКП. Ако Ердоган се кандидира за претседател, се очекува Ѓул да го замени на премиерското место.