Бања Лука, 31 јули 2014 (МИА) - Претседателот на Република Српска Милорад Додик изјави дека РС ќе ги поддржи Хрватите да имаат свој ентитет во БиХ и не ја интересира дали тие во земјата ќе бидат „трети или петти ентитет“.
- Во договорот кој го имам со политичките претставници на хрватскиот народ јасно е дека во комбинацијата за хрватски ентитет никој не ја допира РС и нас ништо друго не ни е важно, истакна Додик, коментирајќи го извештајот на Меѓународната кризна група, каде како една од опциите за решавање на кризата во БиХ се споменува потреба за создавање на трет, односно хрватски ентитет.
Тој потсети дека РС има јасен став, а тоа е дека БиХ мора да се врати на Дејтонската изворна структура или ќе биде неодржлива.
Меѓународната кризна група и дел од членовите на Европскиот парламент повторно го покренаа прашањето за организација на БиХ со три, односно четири територијални единици, што според нив би претставувало излез од „сегашниот политички хаос“ во оваа држава.