Санкциите на ЕУ против Русија ќе и наштетат на грчката економија

Атина, 1 август 2014 (МИА) – Санкциите на ЕУ против Русија негативно ќе влијаат на грчката економија, оцени денеска шефот на Грчката конфедерација на комори (ЕСЕЕ) Василис Кордикис.

Грција може да не биде во можност да купи ништо од она што е вклучено во забраните на ЕУ, посочи Коркидис, но на руските фирми може да им продава сезонски производи, како што се зеленчукот и овошјето кои имаат кусо време на производство, транспорт и потрошувачки  циклус, јавува дописникот на МИА од Атина.

Според Коркидис, секоја акција предизвикува реакција и за жал реакцијата на Русија ќе биде на сметка на економски послабите земји на ЕУ и затоа Грција тоа веднаш ќе го почувствува во областа на билатералната трговија, патниот транспорт и енергија, како и во туризмот на долг рок.

- Ефективна интервенција на нашата економска дипломатија за политичко решение на највисоко ниво сега е од суштинско значење за да се надмине кризата во грчко-руските економски односи и да се спречи руски ембарго за нашата земја, истакна тој.