Анкара/Берлин, 23 септември 2014 (МИА) - Тврдења дека Турција тајно разработува нуклеарно оружје, се појавија во германскиот печат. Во напис на весникот „Велт“, се тврди дека тоа е една од причините поради кои германското разузнавање ја шпионирало Турција.
„Велт“ тврди дека можно е Турција да добила технички податоци, потребни за создавање атомска бомба, од Пакистан.
Според авторот на текстот, во периодот од 1987 до 2002 година, Турците учествувале во дејностите на пакистанскиот нуклеарен физичар Абдул Кадир Хан за пренесување на илјадници центрифуги во Либија, Иран и Северна Кореја.
Во текстот се тврди дека одлучноста на Анкара да се здобие со нуклеарно оружје била една од причините Германската служба за надворешно разузнавање (БНД) да ја следи Турција.
„Велт“ наведува дека според информации на БНД во 2010 година по налог на Ердоган бил изграден комплекс за збогатување ураниум, како и оти Турција располага со големо количество центрифуги, кои потекнуваат веројатно од Пакистан.