Белград, 20 окотмври 2014 (МИА) - Дронот со знамето на Голема Албанија, кој беше причини за инцидентот и прекинот на фудбалскиот натпревар Србија-Албанија во Белград, го
лансирал 32-годишниот Албанец,
Исмаиљ Моринај, кој живее во Италија, тврди белградскиот весник „Информер“.
Во своето денешно издание, весникот наведува дека Моринај, кој се занимава со алпинизам, го поставил дронот на куполата на црквата „Св. Архангел Гаврил“ и од таму го лансирал кон стадионот на „Партизан“.
Според „Информер“, Моринај влегол во Србија на 11 октомври со автомобил со италијански регистарски таблички и се сместил во еден хостел во близина на стадионот, каде се идентификувал со италијанска лична карта.
Весникот тврди дека веднаш по натпреварот на 14 октомври, Моринај побегнал од Србија, но дека во текот на викендов бил идентификуван и лоциран од страна на српската полиција, која преку Интерпол распишала потерница по него.
Постојат сознанија дека Моринај и братот на албанскиот премиер Еди Рама, Олси се познаваат одамна и тоа доста добро и дека заедно во детали ја испланирале акцијата за уфрлање на дронот на стадионот со цел да предизвикаат нереди, наведува весникот.
Според „Информер“, откако Моринај го „довел“ дронот до стадионот, контрола врз леталото презел
Олси Рама, кој бил сместен во една од ложите и од таму управувал со него преку апликација инсталирана на неговиот Ајфон.