Белград, 12 ноември 2014 (МИА) - Лидерот на Српската радикална партија Воислав Шешељ пристигна во Србија по 11 и пол години поминати во Хаг. Авионот во кој беше Шешељ слета на аеродромот по 13 часот.
На аеродромот „Никола Тесла“ Шешељ го дочекаа членови на семејството, раководството на партијата и многубројни приврзаници.
Приврзаниците на Шешељ пред зградата на аеродромот го дочекаа со трубачи и скандирање „Војо, Србину“, и „Војо, војводо“, и со навивачки факели.
Иако беше најавено дека тој ќе се обрати на новинарите, тоа не се случи.
Шешељ веднаш влезе во автомобилот и го напушти аеродромот. Планирано е тој да се упати кон седиштето на партијата во Земун.
Пред слетувањето на авионот од Хаг, а по доаѓањето на аеродромот на семејството на Шешељ, приврзаниците на Шешељ извикуваа навредливи пароли на сметка на властите во Белград и особено против лидерот на Српската напредна партија и премиер Александар Вучиќ.
Судскиот совет на Хашкиот трибунал минатиот четврток одобри ослободување на претседателот на СРС Воислав Шешељ од Хашкиот трибунал.