Каменос нема да биде заменик-премиер на ГрцијаАтина, 26 јануари 2015 (МИА) - Лидерот на Независни Грци (Анел) Панос Каменос ќе има министерско место во коалициска влада со Сириза и нема намера да побара да биде назначен за заменик-претседател на владата, соопштија партиски извори.
Како што јави дописникот на МИА од Атина, истите извори потврдија дека прашањето за грчкиот долг ќе биде врвен приоритет на новата влада.
Според најновите информации, новиот кабинет ќе има десет министри и неколку заменици и помошници министри кои често ќе заседаваат.
Партиските извори исто така откриле дека „прашањето за претседател на Грција е затворено и оти има договор меѓу двете страни“.
- Црвените линии на АНЕЛ за националните прашања ќе се почитуваат, изјавил извор од помалиот коалициски партнер и додал дека „има добра хемија и доверба меѓу Ципрас и Каменос“.
Лидерот на Независни Грци денеска се сретна и со архиепископот на Атина и цела Грција Јеронимос со кого разговараа за прашања поврзани со црквата и нејзината работа.
По средбата, Каменос изјави дека побарал благослов од архиепископот „за новиот почеток“ и додаде дека неговата партија „ќе соработува со секого за доброто на грчкиот народ“.
Инаку, во меѓувреме се обработени сто проценти од гласовите кои само ги потврдија претходните резултати. Сириза освои 36,34 проценти од гласовите и 149 места во парламентот, Нова демократија 27,81 отсто и 76 места, Златна зора 6,28 проценти и 17 места, Потами 6,05 отсто и исто 17 места, Комунистичката партија на Грција (ККЕ) 5,47 проценти и 15 места, Независни Грци (АНЕЛ) 4,75 и 13 места, и ПАСОК ја доби поддршката од 4,68 отсто од избирачите и си обезбеди 13 места во новиот состав на грчкиот парламент.
На изборите не гласале 36,13 проценти од регистрираните избирачи.
|