Атина, 27 февруари 2015 (МИА) - Опозициската конзервативна партија Нова демократија во Грција бара продолжувањето на спасувачката програма за земјата да биде подложено на гласање во Парламентот.
Засега не е јасно дали Владата ќе го внесе прашањето во Парламентот или ќе побара одобрување на продолжувањето преку законодавен указ.
Премиерот Алексис Ципрас се судира со резерви во својата партија СИРИЗА во однос на договорот.
Германскиот Парламент денеска со огромно мнозинство одобри продолжување на спасувачката програма за четири месеци. Претходно Парламентот на Холандија исто така ја ратификуваше вчера одлуката за продолжување на грчката програма.
- Не е возможно други европски парламенти да гласаат за продолжување на помошта за Грција, а тоа право да биде ускратено на грчкиот Парламент, зарем СИРИЗА се плаши од своите пратеници, рече портпаролот на Нова демократија Костас Карагунис.