Прилеп, 22 јули 2013 (МИА) - Годинашниот 11 по ред „Пиво фест“ во Прилеп во сите четири фестивалски дена го посетиле околу 400.000 посетители и според пресметките се испиле 300 тони пиво, а се изеле околу 100 тони скара.
Според градоначалникот на Прилеп Марјан Ристески, градот се потврдил како одличен организатор на вакви големи масовни манифестации.
- Докажавме дека Прилеп е кадарен да организира, би рекол, манифестација од Балкански тип со 400.000 посетители и организациски се да протекне во најдобар ред без ниту еден инцидент. Тоа градот го сместува во најфестивалски во Македонија, рече Ристески на денешната прес - конференција.
Пресметките, посочуваат организаторите, покажуваат дека градот и регионот имаат бенефит од околу 4 милиони евра.
- Ако секој посетител од околу 400.000, потрошил барем по 10 евра, бенефитот не само на градот и регионот е околу 4 милиони евра. Дел од тие пари индиректно влегуваат во локалниот буџет од каде општината решава и комунални проблеми, вели Ристески.
Манифестацијата „Пиво фест“ има буџет од 200.000 евра. Од нив една третина се од буџетот на локалната самоуправа, а другите се донаторства од бизнис секторот, пиварниците учесници.
- Сакаме да изградиме и кампинг простор со кампинг-приколки кои ќе се изнајмуваат на посетители. Тогаш туристичкиот бенефит ќе биде уште поголем. Догодина локалните власти ветуваат дека манифестацијата ќе ја збогатат и може да се очекува и учество не само на балкански, туку и на светски музички имиња, најавија организаторите на „Пиво фест“.