Скопје, 8 август 2014 (МИА) - Македонија денеска на сметката на Буџетот доби 36.4 милиони евра од Заемот за развојни политики за конкурентност финансиран од Светска банка, соопшти Министерството за финансии.
- Република Македонија ги доби овие средства за успешно спроведување на реформите и развојните политики на Владата за подобрување на деловната клима и конкурентноста. Позначајни реформи поддржани со овој заем се: развојот на производство со висока додадена вредност преку привлекување инвестиции, олеснување на преструктуирањето на земјоделскиот сектор, подобрувањето на ефикасноста на трговската размена со странство, поголема флексибилност на пазарот на труд и развој на вештини и иновации, се наведува во соопштението.
Овој заем е продолжение на Првиот програмски заем за развојни политики за конкурентност во износ од 38.7 милиони евра од 2013 година. Како што стои во соопштението, доделувањето и на втор заем е потврда за довербата на Светска банка во квалитетот на економските политики во Република Македонија.
Одржувањето на макроекономската стабилност и континуираното спроведување на реформски мерки од страна на Владата насочени кон зголемување на инвестициите, вработеноста и конкурентноста на македонската економија, додаваат, во континуитет се позитивно оценети од Светска банка што резултира со нивна финансиска поддршка.