Гетеборг, 20 август 2014 (МИА) - Шведската фабрика за патнички автомобили „Волво Персонвагнар“ денеска соопшти остварена добивка од 535 милиони круни (околу 58 милиони евра) во првиот квартал во 2014 година, јави дописникот на МИА од Гетеборг.
Во истиот период лани „Волво“ имаше загуби во висина од 778 милиони круни.
Најновиот извештај презентиран денеска покажува дека продажбата на „Волво ПВ“ пораснала за 8 милијарди круни и во првата половина од годинава изнесувала вкупно 65 милијарди круни, или нешто повеќе од 7 милијарди евра.
Позитивниот резултат најмногу се должи на добриот пласман на пазарите во Шведска, Западна Европа и Кина.
Пресвртот од минус во плус, како значаен чекор кон стабилизирање на дејноста, добива во значење и со најавите на генералниот директор на концерното „Волво“, Хокан Самуелсон, кој денеска соопшти дека до крајот на годинава најверојатно ќе бидат можни нови 500 вработувања во фабриката за патнички автомобили во Гетеборг. „Волво“ монентно минува низ фаза на нови вложувања и истражувачки проекти, при што, меѓу другото, новиот модел „ ХС90“ ќе биде претставен идната недела.