Атина, 30 март 2015 (МИА) - Претставници на Грција и нејзините кредитори денеска веќе трет ден ги продолжија разговорите во Брисел со цел постигнување договор за реформите со кој би се одблокирала финансиската помош за Атина.
Портпаролот на Европската комисија, Маргаритис Схинас денеска изјави дека разговорите во текот на викендот биле „конструктивни“, но оти не е постигнат договор. Тој додаде дека технички тимови на институциите ќе треба да спроведат дополнителни проверки на факти во Атина.
Како што јави дописникот на МИА од Атина, грчки владини извори изразија задоволство од текот на преговорите кои почнаа во петокот, кога Грција ја поднесе својата листа на фискални и мерки за реформи. Тие истакнаа дека постојат некои разлики меѓу двете страни, но оти технократите ги разгледуваат предлозите „точка по точка“, во обид да постигнат заеднички јазик.
Меѓу клучните точки за кои постои несогласување се неподготвеноста на Грција во моментов да разговара за пензиските реформи, приватизацијата и кои мерки ќе се преземат за справување со затајувачите на данок со цел зголемување на приходите.
Во исто време, германските медиуми, чии извештаи се пренесуваат во Грција, пишуваат дека преговорите меѓу Атина и Брисел за новата транша од 7,2 милијарди евра не успеале, иако изминатиов викенд била една од последните шанси Грција да се спаси од банкрот.
Кредиторите сметаат дека грчките предлози не се доволни и оти треба да се „дотераат“. Учесниците во преговорите во Брисел соопштиле дека се уште не постои употреблива основа за преговори и оти грчката Влада, наместо листа со реформи, поднела само низа документи во електронска форма и тоа на мобилни телефони. Списокот бил само на грчки јазик, а грчките претставници го изнеле и усно.
- Листата не е кредибилна, изјавил еден дипломат од ЕУ за германската агенција ДПА.