Скопје, 27 април 2015 (МИА) - Сојузот на синдикати на Македонија годинава ќе го прослави 1 Мај - Меѓународниот ден на трудот со марш на солидарноста на кој ќе биде прочитан првомајски манифест со пораки за колективни договори за сите, сигурни работни места и сигурни плати за работниците.
Маршот ќе почне напладне од пред зградата на ССМ по што учесниците ќе поминат покрај Собранието на Република Македонија.
- Сојузот на синдикатите на Македонија годинава со оваа манифестација активно ќе се вклучи во вкупните активности што ќе ги реализираат ITUC и ETUC, а кои ќе бидат фокусирани на обезбедување на колективни договори за сите работници, односно и таму каде што ги нема. Активностите во текот на годината ќе бидат насочени и кон обезбедување на сигурни работни места, работен однос на неопределено време и сигурни плати за сите работници, изјави претседателот на ССМ, Живко Митрески во интервју за МИА што целосно ќе биде објавено во петок.
Во интервјуто Митревски се осврнува и на придобивките од примената на неколку закони што беа донесени како резултат на нивните кампањи организирани изминатите години по повод Меѓународниот ден на трудот, а говори и за неговиот петгодишен мандат и за претстојниот конгрес на ССМ на кој ќе се избира нов претседател на оваа организација.