Изградена канализациска мрежа во штипската населба Македонка

Штип, 22 мај 2015 (МИА) - Жителите од штипската населбата Македонка добија фекална канализација. Тоше Георгиев од Општина Штип вели дека денеска бил направен технички преглед и прием од страна на инвеститорите, по што, како што рече, оваа мрежа ќе биде дадена на натмошно одржување на комуналното претпријатие „Исар“.

- Станува збор за изградба на канализациона мрежа во должина од 1.500 метри, инвестицијата е околу 4 милиони денари, од кои 60 проценти донираше Швајцарската агенција за развој СЕКО и 40 проценти се инвестиција од буџетот на Општина Штип. Станува збор за примарна мрежа, по што комуналното претпријатие „Исар“ треба да ја реализира и секундарната мрежа, вели Георгиев.

Тој додава дека овој проект бил еден од приоритетните за општината со цел да се создадат добри услови за живот во населбата Македонка. Георгиев најави дека во текот на наредните месеци ќе почне и изградбата на канализациона мрежа во приградската населба Стар Карорман.