Брисел, 15 септември 2015 (МИА) - Во Европската комисија денеска не сакаа да ги коментираат новите мерки на Унгарија против бегалците, ниту намерата на унгарските власти со сила да ги враќаат во Србија.
- Побаравме од Унгарија да ни ги разјасни новите закони и како ќе бидат применувани, изјави пред новинарите потпаролката на Eврокомисијата Наташа Берто, одговарајќи на прашањето дали сетот закони кој утрово стапи во сила е во согласност со европските правила.
Новите закони вклучуваат и поголеми овластувања за полицијата и војската да ги спречат бегалците да влезат во Унгарија и затворски казни за оние кои илегално ќе ја минат границата.
Берто рече дека нема да ги коментира законите додека не стигне објаснување од унгарските власти и додека европскиот комесар за внатрешни работи и миграција Димитрос Аврамопулос не се врати од претстојната посета на Будимпешта.