Загреб, 21 октомври 2015 (МИА) - Да можев, веднаш ќе се вратев во Сирија, изјави за Би-Би-Си една млада Сиријка, која заедно со голема група бегалци и имигранти се наоѓа во еден импровизиран камп на хрватска територија, од каде чекаат за да бидат префрлени кон Словенија и Австрија.
Младата жена, чиј идентитет не е соопштен, не го крие своето незадоволство од состојбата во која се наоѓаат бегалците кои патуваат низ „балканскиот коридор“ и од постојаните расправии меѓу државите, кои еднаш ги отвораат, а пото, ги затвораат граничните премини, оставајќи ги луѓето на дождот и студеното време.
- Ова што ни го прават земјите од Балканот е навистина срамота. Веќе не е ниту важно кој е одговорен за сето тоа, изјавила во разговорот оваа жена.
Според британската јавна медиумска компанија, бегалската криза предизвика расправија меѓу Србија, Хрватска и Словенија, кои се обвинуваат меѓусебно за тоа кој е одговорен за тоа што илјадници бегалци и мигранти од Турција, преку Грција и Македонија, доаѓаат на српско-хрватската граница, во намера да продолжат натаму кон Австрија и Германија, но заглавуваат на премините.
Белград, Загреб и Љубљана и покрај напорите да им помогнат на луѓето, почнаа да се закануваат еден кон друг со подигнување бариери и огради или со испраќање војска на границите, прекорувајжи го првиот сосед дека не се придржува кон договореното и дека со тоа продонесува за застојот во трансферот на бегалците.
Најголем број од овие луѓе се Сиријци кои тврдат дека бегаат од војната во нивната земја, но има и Ирачани и Авганистанци. Дел од нив признаваат дека не бегаат само од војната, туку одат кон Западот во потрага по подобар и побогат живот, затоа што во нивните земји тоа не може да го добијат.
Владата на Унгарија, прва почна да гради огради од жица, по граничната линија, прво со Србија, а потоа и со Хрватска, добивајќи разбирање и подршка само од Чешка и Словачка, но сега и во Загреб се зборува дека би можело да се постави „некаков вид бариера“ на границата кон Србија.
Словенија забрзано подготвува закон за да префрли војска на границата со Хрватска и бара помош од ЕУ во средства и во дополнителни полициски сили за, како што велат властите во Љубљана, заштита на шенгенската граница.
Словенечките власти своите најнови потези околу бегалската криза ги оправдуваат и со реакциите во Австрија, тврдејќи дека Австријците почнале со ограничување на приливот на бегалците.
Австрискиот министер за внатрешни работи, меѓутоа, за Би-Би-Си изјави дека Владата во Виена засега „нема специфично определен лимит“ за приливот на бегалци и мигранти.