Москва, 28 февруари 2016 (МИА) - Триесет и шест лица загинаа во експлозиите на метан во рудникот за јаглен „Севернаја“ во руската република Коми.
Компанијата оператор на рудникот соопшти дека спасувачките операции се прекинати и кон бројот на загинатите ги додаде и 26-те рудари, кои се сметаат за исчезнати од четвртокот досега.
Несреќата во рудникот покрај Воркута, на повеќе од сто километри северно од поларниот круг, е несреќен случај со најмногу жртви во Русија изминатите години.
Четири лица загинаа во четвртокот во првите две експлозии, а беше соопштено за 26 заробени рудари. Во рудникот вчера имаше нова експлозија и во неа загинаа шест лица.
Според техничкиот експертски совет, 26-те исчезнати, кои се наоѓале во рудникот за време на експлозијата немале никаква шанса за преживување, пишува во соопштението Татјана Бушкова, портпарол на компанијата „Воркутаугол“.
- Спасувачките операции беа прекинати, додаде таа.
Вкупно 110 лица се наоѓаа во рудникот за време на несреќата во четвртокот, кога на длабочина од 748 метри експлодира метан.