Киев му забрани влез на Михаил Горбачов во УкраинаКиев, 26 мај 2016 (МИА) - Владата на Украина донесе одлука да му забрани влез на украинска територија на последниот советски лидер Михаил Горбачов во период од пет години, поради неговата јавна поддршка на руската анексија на Крим, јави ДПА.
- Забраната е воведена во интерес на националната безбедност, поради јавната поддршка на воената анексија на Крим, објави портпаролката на украинската безбедносна служба Олена Хитљанска на својот профил на Фејсбук.
Забраната за влез на 85-годишниот Горбачов во Украина следи по неговото интервју за британскиот весник „Сандеј Тајмс“ во кое тој вели дека во случајот со Крим ќе постапел на ист начин како и рускиот претседател Владимир Путин, доколку би се нашол во таква ситуација.
- Јас секогаш ја почитувам слободната волја на луѓето, а мнозинството жители на Крим сакаа да се обединат со Русија, изјави Горбачов во интервјуто.
Русија го окупира и анектира полуостровот Крим во 2014 година, по смената на проруски ориентираниот украински претседател Виктор Јанукович и доаѓањето на власт во Киев на прозападни политичари.
Пред анексијата, Русија организираше референдум на Крим, на кој според официјалните резултати, мнозинството жители на полуосторвот се изјасниле за припојување кон Руската Федерација. Меѓутоа, Украина и западните земји овој референдум го оценија како незаконски.
|