Камерон: Не сум таен приврзаник на БрекситЛондон, 27 мај 2016 (МИА) - Британскиот премиер Дејвид Камерон ги отфрли како неточни тврдењата дека тој е поблиску до идејата за Брексит, отколку што е „запален Европеец“.
- Не сум поблиску до ништо. Се уште ги имам истите погледи за ЕУ, како и кога влегував во активната политика, изјави Камерон, инсистирајќи дека тој никогаш не бил близок до кампањата за напуштање на ЕУ.
- Она за што се застапувам е да се постигне вистинскиот резултат, што значи да се обезбеди реформирање на Унијата (Лондон веќе обезбеди специјален статус за себе), како и Велика Британија да остане во ЕУ, затоа што тоа претставува национален интерес на земјата, рече Камерон, додавајќи и дека на Самитот на Групата на најразвиени земји (Г-7), што се одржа во Исе Шима во Јапонија, се расправало за евентуалниот излез на Велика Британија од ЕУ.
Околу можноста Британците да излезат од ЕУ во заедничкото соопштение на САД, Германија, Франција, Италија, Јапонија, Канада и Велика Британија, се вели дека Брексит претставува глобална закана, поради потенцијалното назадување во настојувањето за зголемување на светската трговија, инвестициите и создавањето нови работни места, што потоа би можело да претставува ризик за глобалниот економски раст.
- Кога се соочувате со тешка одлука, добра работа е да слушнете што за тоа мислат вашите пријатели, изјави Камерон, коментирајќи го заколучокот на Г-7.
Дилемите околу тоа дали Камерон е „скришно определен за Брексит“ околу рефередумското изјаснување на 23 јуни, ја покрена еден негов поранешен советник, кој за лондонски „Тајмс“ изиави дека доколку не би бил премиер, тој во срцето би бил за заминување од ЕУ.
Неговиот поранешен сојузник и пријател, а сега политички противник Борис Џонсон по тоа му порача на Камерон дека „не е доцна да смени страна“ и да и се приклучи на кампањата за Брексит што ја предводи Џонсон.
Камерон на ова возврати дека Џонсон, со кого се познава и е заедно уште од студентските денови, никогаш порано не бил за напуштање на ЕУ.
|