Брисел, 13 јуни 2016 (МИА) - Претседателот на Европскиот совет Доналд Туск изјави дека ќе бидат потребни најмалку седум години за да се спроведе процесот на раздвојувањето на ЕУ со Велика Британија доколку на референдумот од 23 јуни, мнозинстото Британци се определат за Брегзит.
- Најлесно ќе биде раскинувањето на договорите меѓу Британија и ЕУ, за што веројатно ќе бидат доволни две години, изјави Туск во разговор за германските медиуми.
Според него, проблем во ваквиот процес, што е непознат за Брисел, затоа што никој досега не ја напуштил Унијата, ќе биде воспоставувањето на новите односи на ЕУ со сега „отцепената“ Британија и со секоја од преостанатите 27 земји- членки поединечно.
Туск смета дека овој процес би можел да трае најмалку пет години и забележува дека не е воопшто сигурно оти на крајот тој ќе биде успешен.
Изјавата на Туск доаѓа по предупредувањето на германскиот министер за финансии Волфганг Шојбле дека на Британија, во случај на Брегзит, нема да и биде дозволен пристап до заедничкиот европски пазар, како што тоа сега го имаат Норвешка, или Швајцарија.
Шојбле им порача на оние кои водат кампања за излез од ЕУ, дека гласањето против членството во ЕУ, значи и гласање против заедничкиот европски пазар, па затоа не може да функционира идејата на Лондон дека по Брегзит членството ќе биде заменето со слободен пристап на единствениот пазар.