Британскиот министер за финансии нема да се бори за премиерската функција

Лондон, 28 јуни 2016 (МИА) - Британскиот министер за финансии Џорџ Озборн нема да учествува во трката за премиерска функција, бидејќи е голем приврзаник за останување на Велика Британија во ЕУ.

Владата е под притисок да пронајде наследник на Дејвид Камерон, кој ќе се повлече во октомври од функцијата премиер, откако Британците на референдум изгласаа напуштање на ЕУ.

- Не е во моја природа да ги вршам работите половично. Во кампањата за референдумот учествував со сите сили за останување во ЕУ. Се борев за таа кауза. Затоа сметам дека јас не сум човекот кој може да обезбеди единство, кое во овој момент и е неопходно на мојата партија, нагласи Озборн.

Пред кампањата за референдумот, мнозинството го сметаа Озборн за можен кандидат за наследник на Камерон во иднина, бидејќи економијата на Велика Британија беше меѓу најбрзо растечките економии на развиените земји.