Мигранти осудени на затворски казни заради нелегален влез во Унгарија

Будимпешта, 1 јули 2016 (МИА) - Суд во Унгарија денеска донесе пресуда со која 10 мигранти се осудени на казни од една до три години затвор, затоа што минатата година нелегално ја минале унгарската граница, откако долж граничната линија со Србија беше поставена бодликава жица, јави Танјуг.

Ова е првата пресуда врз основа на законот усвоен непосредно пред немирите на унгарско-српската граница, во 2015 година, со кој минувањето на границата се третира како „предизвикување неред“, а се казнува со казна од една  до пет години затвор, пренесуваат британските медиуми.

Унгарските обвинители  денеска донесоа пресуди и за двајца Романци. Еден е осуден за „криумчарење луѓе“, додека вториот е осуден за „обид за убиство“" и „суровост“ затоа што, при  криумчарењето на 106 мигранти, пренатрупаниот камион со луѓе го оставил на сонце. Мигрантите на сила ја отвориле вратата од камионот и побегнале.

Унгарскиот премиер Виктор Орбан зазеде цврст став за прашањето на миграцијата, тврдејќи дека „Европската Унија ризикува да доживее втор вид миграција - кога заморените членки ќе почнат да ја следат Велика Британија, доколку не го сторат истото што го прави  Унгарија“.

Според соопштението на унгарскиот суд, по завршувањето на затворските казни осудените мигранти ќе бидат протерани од Унгарија.