Италијанскиот парламент расправа за легализација на канабисот

Рим, 26 јули 2016 (МИА) - Италијанскиот Парламент започна расправата за предлог законот за легализација на производството и употребата на канабисот за лични потреби, кој предизвикува големи контроверзи и не е поддржан од Владата.

- Фактот дека законот за легализирање на лесни наркотици беше вклучен во дневниот ред, покренува дебата која никогаш не би се одржала во земјава, изјави Роберто Џакети, пратеник од Демократската партија и потпретседател на Долниот дом на Парламентот.

- Откако ќе одлучиме да им дозволиме на луѓето да се дрогираат, ќе заборават на реалноста, на сиромаштијата и невработеноста, реплицираше Масимилијано Федрига, лидер на парламентарната група на Северната лига.

Со предложениот текст не се укинува целосно забраната за продажба на канабис, но се предвидува дозвола за одгледување на најмногу пет билки и посед на 15 грама во едно домаќинство. Во замена на тоа ќе биде забрането да се пуши канабис на јавни места и на работа.

Според предлог законот, надлежните институции во Италија ќе можат да одгледуваат и продаваат канабис, слично како во тутунската индустрија.