Украина протестира во ОН поради указот на Путин во врска со Крим

Њујорк, 29 јули 2016 (МИА) - Советот за безбедност на ОН синоќа на ја усвои украинската декларација, со која се осудува указот на рускиот претседател Владимир Путин за вклучување на Крим во Јужниот федерален округ на Русија.

Русија, како постојана членка на Советот, вчера стави вето на текстот, предложен од Киев, соопштија дипломатски извори.

Во предлог-декларацијата „било потврдено целосното почитување на суверенитетот, независноста и територијалниот интегритет на Украина, а изразена е и „длабока загриженост“ на СБ на ОН од указот на Путин.

Документот, освен тоа, потсетува и дека Генералното собрание на ОН во 2014 година ја осудило анексијата на Крим од страна на Москва.

Кремљ соопшти дека Путин со указ го вклучил Крим во Јужниот федерален округ на Русија.

Според украинскиот претставник во ОН, Володимир Елченко одлуката на рускиот претседател за укинување на досегашниот Кримски федерален округ е „ништовна“.