Русија е длабоко вознемирена од турската интервенција во СиријаМосква, 24 август 2016 (МИА) - Русија изрази длабока загриженост од операцијата на турската армија во Сирија, пренесува БТА.
„Москва е длабоко вознемирена од она што се случува на турско-сириската граница. Можноста за дополнително влошување на ситуацијата во зоната на конфликтот е алармантна", се вели во соопштението на руското МНР.
Русија особено се грижи за „можни пропратни жртви меѓу цивилното население и од заострување на несогласувањата меѓу Курдите и Арапите".
„Сириската криза може да се реши само врз основа на меѓународното право, преку меѓусириски дијалог, со учество на сите етнички и верски групи, вклучувајќи ги и Курдите", се вели во соопштението на руското Министерство.
Според турскиот претседател Реџеп Таип Ердоган операцијата на турската армија е насочена не само против групата „Исламска држава", туку и против сириските курдски сепаратисти, истакнуваат западните медиуми.
|