Во Франција уапсени две тинејџерки поради поврзаност со ИД

Париз, 25 септември 2016 (МИА) - Француската полиција уапси две девојки во Ница со средината на месецот под сомнение дека се поврзани со припадникот на Исламска држава, Рачид Кашим, соопшти денеска Канцеларијата на париското обвинителство.

Девојките на возраст од 17 и 19 години користеле шифрирани пораки преку апликацијата Телеграм за комуникација со Кашим, кој се сомничи за учество во повеќе напади или обиди за напади во Франција.

- Девојките се поттикнувани за извршување на напади на одредени цели во знак на одмазда поради убиството на портпаролот на ИД, Абу Мухамед ал Аднан, потврди извор близок до истрагата.

Девојките признале дека размислувале да учествуваат во напад пред да ја отфрлат идејата.

Француската разузнавачка служба на почетокот од септември уапси уште најмалку четири тинејџери осомничени за планирање на убиства во име на ИД. Сите осомничени тинејџери ја користеле Телеграм апликацијата за допишување со Кашим, кој според полициски информации, во моментот се наоѓа на подрачјето меѓу Сирија и Ирак.