Лавров: Киднапирањето на руските војници на Крим е провокација

Минск, 22 ноември 2016 (МИА) - Рускиот министер за надворешни работи Сергеј Лавров денеска изјави дека украинската разузнавачка служба извела провокативен чекор со вчерашното киднапирање на двајца руски војници на Крим.

Додека Москва тврди дека се киднапирани двајца руски војници на Крим, Киев наведува дека тоа се војници дезертери од украинската армија и оти се приведени на територија што е под контрола на Украина.

- Веруваме дека тоа беше незаконска провокација на украинската разузнавачка служба против руски граѓани на руска територија. Нашите служби за спроведување на законот се занимаваат со тој случај, посочи Лавров.

Тој, исто така, наведе дека и понатаму нема изгледи за нов министерски состанок на така наречената Нормандиска четворка (Русија, Германија, Франција и Украина) бидејќи се уште не е усогласен планот за Донбас, кој треба да го одобрат министрите.