Берлин, 31 јануари 2017 (МИА) - Стапката на консолидираната невработеност во Германија падна на рекордно ниво од 5,9 отсто во јануари, информираше германската Федерална агенција за вработување.
Како што јави дописникот на МИА од Берлин, во новата година најголемата европска економија го урна стариот рекорд од 6,1 отсто невработеност и четири месеци по ред забележува намалување на бројот на постојано и привремени невработени, пред се поради зголемениот број на сезонски вработувања, што се зголемиле за 26 илјади во првиот месец од 2017 година.
Аналитичарите на стартот на годината очекуваа стапката на невработеност да изнесува шест отсто, колку што беше забележана во декември 2016 година, но новите бројки ги побија нивните анализи.
Со стапка од 5,9 отсто нивото на невработеност е најниско од германското обединување во 1990 година.