Москва, 6 јуни 2017 (МИА) - Откако Црна Гора стана 29-та членка на НАТО, Русија се закани со одмазднички мерки.
- Во светлината на непријателскиот курс, избран од црногорските власти, Русија го задржува правото да преземе одмазднички мерки на реципрочна основа, реагираше руското Министерство за надворешни работи.
Министерството аргументираше дека „во политика, како и во физиката, секоја акција има реакција“.
Црна Гора носи „целосна одговорност“ откако се присоедини кон санкциите на Еворопската унија против Русија во 2014 година, нагласи руското Министерство за надворешни работи.
Некогаш Русија беше клучен сојузник и водечки инвеститор во Црна Гора. Но, односите меѓу двете земји се влошија откако Подгорица аплицираше за членство во Алијансата.
Во октомври минатата година, црногорските власти ја обвинија Русија за обид за државен удар и за доведување на власт на проруската опозиција. Кремљ ги отфрли тие обвинувања како „апсурдни“.
Во Вашингтон заменик-државниот секретар на САД Томас Шенон ја пофали Црна Гора дека го „искористила сувереното право да избира свои сојузници, и покрај тоа што е исправена пред притисок од други земји“.