Лондон, 14 јуни 2017 (МИА) - Најмалку 30 лица се повредени во пожарот, што избувна во 27-катната станбена зграда во центарот на Лондон, соопшти Службата за брза помош.
Повредените се сместени во пет болници.
- Можеме да потврдиме дека 30 лица се префрлени во пет лондонски болници, изјави претставникот на брзата помош, Стјуарт Криктон.
Повеќе од 200 пожарникари и натаму го гаснат пожарот во зградата Гренвел тауер.
Спасувачките екипи продолжуваат да ги извлекуваат станарите од зградата со 120 станови.
Пожарот избил околу еден часот по полноќ и засега не се знае причината.
Според властите постои можност од пожарот зградата да се урне.