Обид за напад врз воена патрола во Лион

Париз, 23 август 2017 (МИА) - Лице на возраст од педесетина години, во Лион во текот на минатата вечер, се обиде да нападне воена патрола од операцијата Сантинел, пренесува дописникот на МИА од Париз.
Ова лице, како што јавија повеќе француски медиуми, има профил на „неурамнотежен“, се нафрлило со голи раце врз единствената жена од патролата. Тој веднаш бил ставен под контрола од другите челнови на патролата.
Засега е отфрлена претпоставката дека се работи за терористички напад, бидејќи според судски извор немало никакви ревандикции и тоа наводно страдало од сериозни психијатриски проблеми.
Нападот врз припадник на армијата и дел од операцијата за борба против тероризмот „Сантинел“ се случи истиот ден, кога министерот за внатрешни работи најави дека ќе има реорганизирање на мисијата „Сантинел“, со оглед дека нејзините припадници станаа цел на напади.
Според замислата, за што ќе расправа на крајот од месецот, армијата ќе биде вклучена на француска територија со 7000 војници, од кои половината на обезбедување на јавни објекти, додека другата половина во мобилни мисии на набљудување.
Во текот на идната година се очекува и вработување на нови 2.500 до 3.000 полицајци од ветените 10.000 од претседателот Емануел Макрон.