Доверлив документ на Владата на Ирска: Велика Британија е конфузна и хаотична

Официјални претставници на Европската унија сметаат дека пристапот на Велика Британија во преговорите околу Брегзит е конфузен и хаотичен, се наведува во  документ на Владата на Ирска, кој излезе во јавност.

Ирската телевизија РТЕ објави детали од доверлив документ на Министерството за надворешни работи во кој има извештаи на ирски дипломати од земји членки на ЕУ.
Во еден од нив се цитира заменик чешкиот министер за надворешни работи Јакуб Дур кој вели дека му е „жал за британските амбасадори во ЕУ кои се обидуваат да пренесат кохерентна порака, додека дома имаат политички хаос“.

Претставник на летонската Влада вели дека „најголем проблем е политичката состојба во Владата на Велика Британија“.

Британскиот судија во Европскиот суд на правдата Јан Форестер наводно на состанок во Луксембург рекол дека жали поради „квалитетот на политичарите во Вестминистер“ и дека прашува дали британската јавност смета дека Брегзит е „голема грешка“.
Министерството за надворешни работи на Ирска одби да го коментира извештајот.