Во Германија рација против осомничени поддржувачи на ИД

Германската полиција денеска изврши претрес на девет локации во Берлин и во сојузната држава Саксонија-Анхалт, кои се поврзуваат со осомничени поддржувачи на Исламска држава.

Германски обвинители соопштија дека рациите, во кои учествувале 130 полицајци, се дел од истрагата против четири лица осомничени дека се членови на Исламска држава или подготвуваат напади.

Обвинителите веруваат дека двајца осомничени од Берлин пред една година се приклучиле на џихадистите во Сирија и Ирак, додека третиот поминал низ воена обука на Исламската држава. Сите тројца, се претпоставува дека се уште се наоѓаат на територија, која е под контрола на ИД.
Четврто лице е осомничено дека им помагало со тоа што ги возело до аеродромот.

Обвинителство не ги објави имињата на осомничените, ниту ги коментира наводите во весникот „Берлинер цајтунг“ дека тие се поврзани со Тунижанецот Анис Амриј кој уби 12 луѓе со камион на Божикниот саем минатата година.