Брисел, 20 јуни 2019 (МИА) – Лидерите на земјите-членки на ЕУ може да се договорат за поддршка за постигнување „нула штетни гасови“ до 2050 година, јавија бриселски медиуми, по увид во текст подготвен за ЕУ-средба на врвот што ќе се одржи денеска и в петок.
Во документот се упатува повик до блокот да „напредува во работата за услови, иницијативи и создавање рамка со цел да се увиди како да се гарантира премин кон климатски неутрална ЕУ до 2050 година.
Досега тој план има целосна поддршка од 22 од 28 држави од ЕУ.
Покрај тоа, постои и формулација што има за цел да ги смири противниците на таа мерка, како што се Полска и Чешка, која вели дека таквите напори мора „да ја зачуваат европската конкурентност, мора да бидат фер и социјално избалансирани, да ги земе предвид националните околности на земјите-членки и да се почитува нивното право да донесуваат одлуки за нивниот сопствен енергетски микс“.