Норвешките „деца на војната“ бараат финансиска компензација за страдањата преку Европскиот суд за човекови праваСтразбур, 7 март (МИА) - Група „деца на војната“ од Норвешка, родени за исполнување на нацистичката програма за создавање на генетичко чиста раса преку Европскиот суд за правата на човекот бараат финансиска компензација за нивните страдања, од норвешката држава.
Се очекува Европскиот суд за човекови права утре да ги сослуша аргументите на групата, пред да реши дали да го процесуира делото, пренесува МИА.
Речиси 12 илјади деца со норвешка мајка и татко Германец биле родени во Норвешка во текот на Втората светска војна, согласно програмата позната како „Лебенсборн“. Програмата е воведена најпрво од шефот на германските СС сили Хајнрих Химлер во 1935 година за создавање деца од ариевска раса. Надвор од Германија програмата е реализирана и во Норвешка.
Група од 154 Норвежани заедно со четворица Швеѓани и еден Германец се обратиле до Европскиот суд за човекови права со седиште во Стразбур, со аргументи дека целиот живот страдале од дискриминација, а недејствувањето на норвешките власти придонеле за нарушување на нивните граѓански слободи.
-Сакаме да се признае дека владата на Норвешка ги нарушувала правата на тие луѓе. Настојуваме и за финансиска компензација-, изјави адвокатот на групата.
Членовите на групата посочуваат и на дискриминирачки акти меѓу кои и јавни изјави на лекари и свештеници дека „децата на војната“ се психички и генетски штетни, а се и потенцијални нацистички симпатизери.
Жртвите имале и потешкотии при наоѓање работа, а биле малтретирани и во училиштата и на работното место. Некои од нив биле затворани и во психијатриски клиники до 1065 година или учеле во заводи за деца со забавен развој.
Во 2002 година норвешкиот парламент и наложи на владата да преземе мерки, со предлог да исплати отштета од по 24.500 евра по лице. Меѓутоа, членовите на групата бараат по 50 илјади евра и четири пати повеќе за оние чиј живот бил полн со дискриминација.
|