ТППЕ од Куманово бара средства за подобрување на материјално - техничките услови

Куманово, 2 јули (МИА) - Советот на општина Куманово ќе бара дополнителни средства од Министретвото за транспорт и врски за подобрување на материјално - техничките услови на Tериторијалната противпожарна единица.

Командирот на ТППЕ Дејан Илиевски побара од Советот да одобри вработување на 15 сезонски пожарникари, кои во целост би ги задоволиле потребите во текот на летото.

ТППЕ Куманово која покрива три општини, според Илиевски, не поседува хидраулична скала за интервенции, иако покрива повеќе од 150.000 жители. - Ниту кадровската екипираност не ги задоволува законските услови. Во единицата има 31 вработен, иако, Законот налага дека на општини со над 50.000 жители потребен е еден пожарникар на секои две илјади жители, рече Командирот на ТППЕ.

Советниците од кумановскиот Совет имаа можност првпат да го разгледаат годишниот извештај на Територијалната противпожарна единица, откако оваа институција со процесот на децентрализација е под ингеренција на локалната власт.