Руските специјални сили ќе ги проверуваат писмата и другите поштенски пратки на граѓанитеМосква, 21 јули (МИА) - Во Русија во сила влезе наредбата на Министерството за врски која им дава право на припадниците на специјалните служни да ги проверуваат писмата и другите поштенски пратки на граѓаните.
Во согласност со наредбата на Министерството за врски и масовни комуникации, објавена во весникот „Росијскаја газета“, на Министерството за полиција, Федералната служба за безбедност, Воената разузнавачка служба и Федералната служба за обезбедување, како и на цариниците, им е дозволено да отвораат писма, пакети и останати пратки.
Документот, ги прецизира обврските на поштенските работници да создадат услови, вклучувајќи и посебни простории, на претставници на специјалните служби за проверка.
Освен тоа, на „специјалците“ им се гарантира и целосен достап до електронските бази на пошта. Тие можат да утврдат кој, каква и од каде примал пошта.
Руските Интернет изданија укажуваат дека документот, при тоа, не бара решение на судот за проверка на поштата, иако тајноста на телефонските разговори и поштенските преписки е гарантирана со Уставот.
Невладините организации за заштита на човековите права најавија дека пред Врховниот суд ќе бараат укинување на наредбата.
|